ان ما قدرتش تضحك ماتدمعش ولا تبكيش
وان مافضلش معاك غير قلبك اوعى تخاف مش هتموت هتعيش
وان سالوك الناس عن ضى جوه عيونك مابيلمعش ماتخبيش
قولهم العيب مش فيا العيب فى الضى
من كلمات : محمد الناصر الحان : وجيه عزيز غناء :أحمد زكى
(العيب مش فيا العيب فى الضى)
بصوا بقى بقالى فترة عينيا مابتلمعش مفيهاش ضى ومش عارف العيب فى مين فيا ولا فى الضى .
قلت فى عقل بالى يا واد يا محمد ماتفتكر كدة امتى كان الضى فى عينيك بيلمع .. قلت زمان ... زمان أيام بيتنا القديم ..الصغير ..فاكر كل حاجة قيه خصوصا أوضتى أنا و أحمد أخويا مع العلم انى طول عمرى باحلم بالاستقلالية وانى يبقى ليا اوضتى لوحدى.فاكر وانا صغير لما كنت باشخبط على الحيط والعب بلى مع نفسى واعضعض فى سلك التلفون واسيبهم يناموا واصحى اشرب بيبسى من بتاع الضيوف وامى تزعقلى .
فاكر رمضان زمان كنت باستنى الفطار على نار .. نفطر وبعد الفطار نتلم كلنا سوا فى الصالة أنا و أبويا وأمى وأحمد نتفرج على التلفزيون سوا نشرب الشاى سوا نصلى التراويح سوا نروح لقرايبنا سوا ..... دلوقتى الواحد يفطر وجرى على أوضته أو شقته مع تلفزيونه نسكافيهه سلطاته بابا غنوجه الكمبيوتر بتاعه ......
زمان ماكانش فى كل القنوات دى كلها هما يا دوب الأولى والتانية ولما جيبنا ايريال ببوستر كان يوم عيد هيجيلنا القنوات المحلية والنايل تى فى وكنا نستنى نشرة 9 عشان الفقرة الرياضية بتاعت هشام رشاد ولا محسن نوح.
زمان كان فى طعم لكل حاجة... فاكر أوى أو مرة أشترى شريط كاسيت ..اول مرة اكل برة البيت..اول مرة اسافر لوحدى مع اصحابى.. اول مرة اكلم بنت..اول مرة اقلب فلوس من ابويا..اول مرة اصيع ..اول مرةالبس الجزمة من غير شراب..اول مرة احط جل فى شعرى ................دلوقتى باسافر وقت ما احب باكل زى ماباحب عايش مع الذى احب...فاكر زمان كنا نستنى فلم احمد زكى ولا عادل امام فى العيد من السنة للسنةعشان نسافر ونشوفه........دلوقتى دى فى دى افلام بنشوفها قبل ماتنزل السينما اصلا و دش ونت و وصلة ... بس مفيش ضى برضه
سبحان الله زمان ماكانش فى التزام اوى وبرضه دلوقتى الواحد بيحاول صحيح بس زمان مان الواحد مش حاسس انه متلخبط زى اليومين دول كانت الفطرة كويسة والله دلوقتى الواحد حاسس ان الحرام حوالين الواحد فى كل مكان .
حالة من ال( لاحزن) وال (لا فرح)
( وانا على فكرة راضى جدا ومؤمن بان اللى انا فيه ماستاهلش نصه وماتعبتش اوى يعنى والله كله من فضل الله)
مابقاش فى حاجة بتبسطنى فترة طويلة يعنى ممكن الواحد يتبسط 5 كدة وقشطة خلاص يا بوب حلو على كدة.
بجد نفسى الضى يرجع لعنيا تانى بس مش عارف هوه العيب فيا ولا العيب فى الضى؟؟؟؟
فليذكر التاريخ ان ابو سمير كان صاحب اول تعليق
ردحذفصور يا زمان....سجل يا تاريخ
مشهور....ماتقلبش عليا المواجع و رحمة ابوك يا شيخ
كفاية اللي انا فيه
انا عندي حنين عجيب للماضي اليومين دول يا اخي و مش عارف ليه
حتى رحت عامل بوست عندي في المدونة على الموضوع دة
والله الواحد مش عارف يقول ايه يا أحمد معقول تكون المسئولية هى اللى عاملة فينا كدة انت مش متخيل الزهق اللى الواحد فيه ومش أنا لوحدى دة كل أصحابنا يعنى الموضوع مش موضوع شغل مثلا لالا الحالة عامة جدا
ردحذفربنا يرحمنا يا رب